СОСЛАНЫ КАФТ

Алæгаты стыр куывды фæбыцæу сты Сослан æмæ Хызы фырт Челæхсартæг чи хуыздæр ракафынæй: «Кæд ды мæнæй хуыздæр ракафай, Сослан, уæд æз ратдзынæн дæуæн мæ рæсугъд чызг Бедухайы, – загъта Хызы фырт. – Ды та цы 'вæрыс?» «Кæд мæ ды амбулай, уæд æз та дæуæн ратдзынæн мæ номдзыд Церечы згъæр æмæ Бидасы така, стæй мæ цирхъ», – загъта Сослан æмæ йæхиуыл нæ бацауæрста. Æнæуый дæр Бедухайы куырдта æмæ йын æй Хызы фырт нæ лæвæрдта. Сослан рамбылдта. Æмæ кафгæ та куыд кодта! Фыццаг зæххыл æркафыд, стæй уыцы кафгæйæ схызти фынгмæ. Иууыл диссаг та фынгыл уыдис йæ кафт: фынджы былтыл-иу цъилау ныззылдис, афтæмæй иунæг къæбæр, иунæг къус нæ фезмæлын кодта йæ бынатæй, стæй йæм уыйæппæт адæм сæ кæрдты фындзтæ хæрдмæ арæзтæй бадардтой, æмæ уыдоныл кафын райдыдта, раст-иу сыл куыройы цалхау æрзылдис. Стæй цыппархъусыг Уацамонгæ ронгæй дзагæй йæ сæрыл сæвæрдта æмæ кафын райдыдта. Ноджы диссагдæр кафт та уæд скодта – Уацамонгæйæ иунæг æртах дæр нæ акалдта. Æмæ диссагæн дзурынæн баззад Сосланы кафт.

кæс «АРВЫ ДУАР»-Ы СÆРГÆНДТÆ